КҲФ: Боришоти шадид боиси рух додани ҳолатҳои фавқулода дар як қатор минтақаҳои кишвар гардид

3 майи соли 2026 дар натиҷаи боришоти шадиди борон дар як қатор минтақаҳои кишвар ҳолатҳои фавқулода ба қайд гирифта шуданд.

Сел дар ноҳияи Ёвон (17:00)

3 май, тахминан соати 17:00, дар деҳаи Пахтакори ҷамоати деҳоти Ситораи Сурхи ноҳияи Ёвон сел фаромад.

Дар натиҷа:

ба 14 замини наздиҳавлигӣ, иншоотҳои ёрирасон ва 3 манзили истиқоматӣ обу лойқа ворид гардида, зарар расонид

дар деҳаи Оби Мукӣ 3 манзили истиқоматӣ ва дар деҳаи Даштобод 6 манзили истиқоматӣ зарар диданд

Ҳамчунин, дар деҳаҳои Пахтакор, Зафаробод, Рӯдакӣ ва Фирдавсӣ канали шохоби рости магистралӣ аз лойқа ва сангу шағал пур шуда, об ба кӯчаҳо ворид гардид.

Айни замон комиссияҳои дахлдор барои бартарафсозии оқибатҳои офат ва муайян намудани ҳаҷми зарар фаъолият доранд.

Сел дар ноҳияи Деваштич (12:20)

3 май, тахминан соати 12:20, дар деҳаҳои Далён ва Даҳқат сел фаромад.

Дар натиҷа: ба роҳҳо, кӯчаҳо, заминҳои наздиҳавлигӣ ва иншоотҳо обу лойқа ворид гардид

4 манзили истиқоматӣ зарар дид

Корҳои бартарафсозии оқибатҳо идома доранд.

Сел дар шаҳри Панҷакент (15:30)

3 май, тахминан соати 15:30, дар деҳаҳои Ғусар ва Навобод сел фаромад.

Дар натиҷа:

ба заминҳои кишоварзӣ, роҳҳо ва иншоотҳо зарар расид

шоҳроҳи Айнӣ–Панҷакент қисман осеб дид

Талафоти ҷонӣ ба қайд гирифта нашудааст.

Сел дар ноҳияи Ашт (14:50)

3 май, тахминан соати 14:50, дар маркази ҷамоати шаҳраки Шайдон сел ба қайд гирифта шуд.

Дар натиҷа об ба роҳҳо ва таҳхонаҳо ворид гардид.

Сел дар ноҳияи Спитамен (17:30)

3 май, тахминан соати 17:30, дар як қатор ҷамоатҳо сел фаромад.

Дар натиҷа:

ба заминҳои кишоварзӣ, роҳҳо ва иншоотҳо обу лойқа ворид гардида, зарар расонид

Чапашавии қайиқ дар шаҳри Хуҷанд (15:00)

3 май, тахминан соати 15:00, дар дарёи Сир қайиқ бо 7 хонанда ва роҳбари синф чапа шуд.

Онҳо барои сайру гашт ба боғи фарҳангиву фароғатии «Наврӯзгоҳ» омада буданд.

Ҳамаи онҳо сари вақт аз ҷониби қайиқронҳо ва наҷотдиҳандагон наҷот дода шуданд.

Сел дар ноҳияи Варзоб (16:05)

3 май, тахминан соати 16:05, дар маҳалли Шодоб-2 сел фаромад.

Дар натиҷа:

ба як қатор манзилҳои истиқоматӣ

роҳҳо, гузаргоҳҳо ва таҳхонаҳо

обу лойқа ворид гардида, зарар расонид.

Оқибатҳои офат бо ҷалби техника ва наҷотдиҳандагон бартараф карда шуданд.

Ҳодисаи барқзанӣ дар шаҳри Турсунзода (16:05)

3 май, тахминан соати 16:05, дар деҳаи Кадучӣ бар асари раъду барқ ҳодисаи нохуш ба қайд гирифта шуд.

Дар натиҷа:

1 нафар ба ҳалокат расид

2 нафар ҷароҳатҳои вазнин бардоштанд

Соати 19:10 ҷасад ва ҷароҳатбардоштагон ба беморхонаи марказии шаҳри Турсунзода интиқол дода шуданд.

Корҳои бартарафсозии оқибатҳо

Дар маҳалли ҳодисаҳо воҳидҳои Кумитаи ҳолатҳои фавқулодда ва мудофиаи граждании Ҷумҳурии Тоҷикистон ва наҷотдиҳандагон фаъолият доранд.

Корҳои бартарафсозии оқибатҳои офатҳои табиӣ идома дошта, комиссияҳои дахлдор муайян намудани ҳаҷми зарарро анҷом медиҳанд.