Кумитаи кор бо занон ва оилаи назди Ҳукумати Ҷумҳурии Тоҷикистон

Ваколатҳо, вазифаҳо ва функсияҳои асосии Кумита

1. Кумита ваколатҳои зеринро дар соҳаи муқарраргардидаи фаъолият амалӣ месозад:

- дар якҷоягӣ бо мақомоту идораҳои дахлдор тадқиқоти маҷмӯиро (комплексиро) барои таҳияи минбаъда ва ҳамоҳангсозии иҷрои барномаҳои байниидоравӣ оид ба беҳтар гардонидани вазъи демографӣ ва беҳшавии мавқеи зан мегузаронад;

- фаъолиятро оид ба пайдо ва арзёбӣ кардани роҳҳои навовар ва мубрам дар ҳалли масъалаҳои занон ва оила, ташаккули тафаккури мусбати ҷамъиятӣ вобаста ба мавқеи занон дар ҷомеа ташкил менамояд;

- васоити ахбори оммаро барои пахши иттилоот нисбати мавқеи занон, ҳуқуқу имкониятҳои онҳо, асосҳои баробарҳуқуқии гендерӣ ташвиқи тарзи ҳаёти солим, некӯаҳволии маънавӣ, муносибати масъулиятноки ҷавононро барои барпо намудани оила истифода мебарад;

- фаъолияти сохторҳои давлатӣ, ташкилотҳои ҷамъиятӣ ва шарикони байналмилалиро оид ба пешрафти баробарии гендерӣ ва ҳалли масъалаҳои занон ва оила ҳамоҳанг месозад;

- бо мақомоти қонунгузор, мақомоти марказӣ ва маҳалии ҳокимияти иҷроия, ҳизбҳои сиёсӣ, ҳаракатҳо ва ташкилотҳои ҷамъиятии дар доираи Конститутсияи Ҷумҳурии Тоҷикистон амалкунанда ҳамкорӣ менамояд;

- мониторинги иҷрои ӯҳдадориҳои байналмилалии Ҷумҳурии Тоҷикистон дар қисмати пешрафти баробарии гендерӣ татбиқ менамояд;

- ҳангоми зарурат ба ҷаласаҳои худ роҳбарони дахлдори вазоратҳо, идораҳо ва мақомоти иҷроияи маҳаллии ҳокимияти давлатии вилоятҳо, шаҳрҳо ва ноҳияҳои ҷумҳуриро даъват менамояд;

- муроҷиатҳои шаҳрвандонро вобаста ба салоҳияти худ сари вақт ва бо сифат баррасӣ намуда, аз натиҷаҳои он ба ҷонибҳои дахлдор иттилоот медиҳад;

- Кумита дар доираи ваколатҳои худ қарорҳо қабул намуда, аз рӯи ташкил ва иҷрои онҳо назорат мебарад;

-омодагии касбӣ ва такмили ихтисоси мутахассисонро бо мақсади амалӣ намудани сиёсати давлатии тарбия, интихоб ва ҷобаҷогузории кадрҳои роҳбарикунанда аз ҳисоби занон ва духтарони лаёқатманд ташкил мекунад;

- мутобиқи қонунгузории Ҷумҳурии Тоҷикистон, ваколатҳои соҳибмулкиро нисбати амволи давлатӣ, ки бо ҳуқуқи идоракунии оперативӣ барои таъмини иҷрои вазифаҳои Кумита дода шудааст, амалӣ менамояд;

- дар доираи салоҳияти худ ҳифзи маълумоте, ки сирри давлатиро ташкил медиҳад, таъмин менамояд;

- омодагии касбии кормандони Кумита, бозомӯзии онҳо, такмили ихтисос ва таҷрибаомӯзии онҳоро ташкил мекунад;

- мутобиқи қонунгузории Ҷумҳурии Тоҷикистон корҳоро оид ба такмилдиҳӣ, ҳифз, ба ҳисоб гирифтан ва истифодаи ҳуҷҷатҳои бойгонӣ, ки дар ҷараёни фаъолияти Кумита ба вуҷуд омадаанд, анҷом медиҳад;

- бо тартиби муқарраршуда конгрессҳо, конференсияҳо, семинарҳо, намоишгоҳҳо ва чорабиниҳои дигарро дар соҳаи муқарраргардидаи фаъолият ташкил мекунад;

- хароҷоти маблағҳое, ки дар буҷети ҷумҳуриявӣ барои таъминоти Кумита ва татбиқи вазифаҳои ба он вогузоршуда пешбинӣ гардидаанд,  тибқи муқаррарот анҷом медиҳад;

2. 2. Бо мақсади татбиқи ваколатҳо дар соҳаи муқарраргардидаи фаъолият Кумита ҳуқуқ дорад;

- бо тартиби муқарраргардида маълумоти барои қабул кардани қарор оид ба масъалаҳои соҳаи муқарраргардидаи фаъолият зарурро дархост намояд;

- ба шахсони воқеӣ ва ҳуқуқӣ оид ба масъалаҳои соҳаи муқарраргардидаи фаъолият шарҳу эзоҳот диҳад;

- бо тартиби мавҷуда барои омӯхтани масъалаҳои муқарраргардидаи фаъолият ташкилотҳои илмӣ ва дигар ташкилот, олимон ва мутахассисонро ҷалб намояд;

- мақомоти ҳамоҳангсозӣ, машваратӣ ва экспертӣ (шӯроҳо, комиссияҳо, гурӯҳҳо) аз ҷумла байниидоравиро дар соҳаи муқарраргардидаи фаъолият таъсис диҳад;

- бо тартиби муқарраршуда барои интишори санадҳои меъёрии ҳуқуқӣ, эълонҳои расмӣ, паҳнкунии дигар мавод оид ба масъалаҳои соҳаи муқарраргардидаи фаъолият бо васоити ахбори омма ҳамкорӣ мекунад;

-дигар ҳуқуқҳоро дар доираи муқаррароти Низомномаи Кумитаи кор бо занон ва оилаи назди Ҳукумати Ҷумҳурии Тоҷикистон иҷро мекунад.

Суроға: ш Душанбе, кучаи Академикҳо Раҷабовҳо 3

Қабулгоҳ: (992 37)221-34-71

Факс:(992 37)227-17-41