Маҷлиси намояндагони Маҷлиси Олии Ҷумҳурии Тоҷикистон

     Маҷлиси Олии Ҷумҳурии Тоҷикистон, ки қаблан ҳамчун Шурои Олии ҶШСТ фаъолият мекард, таърихи қариб 90-сола дорад. Бояд зикр намуд, ки аввалин даъвати Шурои Олии ҶШСТ соли 1938 ба фаъолият оғоз намудааст. Роҳи тайнамудаи Мақоми Олии намояндагӣ ва қонунгузор аз даъвати якум (1938) то даъвати ҳафтуми Маҷлиси намояндагони Маҷлиси Олии Ҷумҳурии Тоҷикистон (2025-2030) пурпечутоб, дорои аҳаммият, хусусиятҳои хос ва марҳалаҳои гуногун мебошад.  Агар ба сохти давлатдорӣ ва таърихи халқамон каме назар андозем, мебинем, ки меъёрҳои қонун, одоб ва ахлоқ ҳеҷ гоҳ ба сиришти халқи мо бегона набудааст. Қобили зикр аст, ки мақомоти касбии қонунгузорӣ дар шакле, ки имрӯз дар олам фаъолият мекунад, падидаи нисбатан нав ва  зодаи чанд садаи охир мебошад.

     Бояд зикр намуд, ки яке аз саҳифаҳои рангину пурҷилои рушди мақомоти қонунгузории тоҷик баргузории Иҷлосияи таърихии 16-уми Шурои Олӣ, 16 ноябри соли 1992 дар шаҳри Хуҷанди бостон аст, ки дар он муҳтарам Эмомалӣ Раҳмон ба вазифаи Раиси Шурои Олии Ҷумҳурии Тоҷикистон интихоб шуданд.

     Аз қарорҳои Иҷлосияи таърихии XVI Шурои Олии Ҷумҳурии Тоҷикистон тақдири минбаъдаи давлати соҳибистиқлоли  Тоҷикистон, таъмини воқеии волоияти қонун, пойдории қонуният ва тартиботи ҳуқуқӣ, фаъолияти босамари мақомоти ҳифзи ҳуқуқ вобастагии калон дошт.    

Суроға: Ҷумҳурии Тоҷикистон, шаҳри Душанбе, хиёбони Рӯдаки

Тамос: Шӯъбаи муроҷиат ва қабули шаҳрвандон; (992 37) 221-13-78, (992 37) 221-11-43

E-mail: info@parlament.tj